Li ser vîdeoyê bi tirkî "xwe bi hev bigirin" nivîsandibû.
Bi bawerîya min, bi destan û bi mîmîkên ecêb hewl dida peyameke sublîmînal bide!
Bi qasî nîvseetekê ez li ser wê vîdeoyê fikirîm bê Xalê Hesîb xwestibû ji me re çi bibêje!🤔
Û ji nişka ve zingînî ji serê min hat!
Min xwe bi hêla din ve qulipand û xirpişîm ser sînga hevala xwe, di nav xwedanê de me hevdu gevizand; bêhn li me çikîya!
Piştî min kurmê xwe şikenand (bi îhtîmaleke mezin kurmê wê jî şikest) û ez rabûm ber bi serşokê ve çûm, wek deh kes ji min re bibêje "Hey himeq! Te ji peyama xalê xwe Hesîb fêhm nekiriye" ez dîsa paş ve vegerîyam.
Vê carê heta dawîyê min guh da vîdeoyê û lê temaşe kir...
Tu nabêjî Xalê Hesîb xwestîye ji me re bibêje "Tifaq tifaq tifaq!" lê ez li ber neketime, mixabin.
Min nahletek li Şeytên anî û bi sloganan min êrişî serşokê kir; heta min serê xwe şuşt, hew mabû sabûn ji nav lepên baz bide û here gilîyê min li qereqolê bike!
Zirqalibek sabûn bi qêrîna sloganan di nav lepên min de bû şima û herikî devê qulika serşokê, li devê qulika serşokê ji kefê konek hat vegirtin!..
Gotina Dawî
Got,
-Tiving derket, mêranî betal bû!
Got,
-Heft xwezî bi tivingê! Tew piştî ev medyaya sosyal derket, mejî xwe kuşt, aqil bi çolê ket!..
