Serjêkirina qurbanan li we nakeve, lew jixwe bi salan di ber dîn îdeolojî û pêxemberên derewîn de we zar û zêçên xwe kirin qurban û qurbanî,
loma jî…
hey we xêr ji serjêkirin û xwîna zar û zêçên xwe nedît, qe nebe belasebeb gunehên wan pez û dewarên bêziman nexin stuyê xwe.
Axir…
Cejna we ya qetlîama bêziman pîroz be!
Serokê sererd û binerd ku hayê wî ne ji ser erdê heye ne jî ji bin erdê, rabûye ji bo zimanê kurdî gotinên ji xwe mezintir kirîye,
lê jixwe…
êdî hingî biçûk e û xwe biçûk xistîye, çi jî bibêje ew ê jê mezintir be û jê mezintir bîmîne.
Axir…
birêz û mirêz serok ku zir naxirek li ber te şujde dibe û tu çi jî bikî li pey te ye, ji pey te venagere,
ka ji kerema xwe re kerem bike were li koşka Devlikenê Cemîlê Hisênê Îsayê Hesoyê Îsayê Gêncoyê Şêxoyê Mehemê Polêd bibe mêvan
bê do û pêr û îro di wê koşkê de li ser dîrok û civak û ehlaq û felsefe û ilm û mîzaha wê axê bi wî zimanî çi civat û şevbuhêrk gerîyane/digerin, belkî tu fedî bikî,
lê heger…
qebhet bi ser fedîyê de nehatibe, haa!
Îja berxê xalê xwe…
ku em dizanin bê bezê guhê xalanên te ji ku ye, ew girava xalanên te li ser navê te tapo kirîye, li te pîroz be û tu hezar xêrî jê bibînî,
lê tu bi ya min dikî…
meseleya ku ne meseleya te be anku karê ku ne karê te be bêvila xwe nexe nav, çêtir e
heger na…
jixwe kenê me bi te tê, balo kenê guran bi xwe neyne.
It’s okay?
Gotina Dawî
Vê teqtîk û stratejîyê mejî li me bloke kir, kes nema ji guh û çav û aqilê xwe bawer dike, mixabin!
Nizanim,
belkî ev terz jî terzeke teqtîksel û stratejîstîksel be…
