pîrek heyştêsalî ya êdî bêhna axê jê difûre, nikaribe bi zimanê wê axê daxwaz û merema dilê xwe ji nevîyên xwe re bibêje!..
Ha ev e ha çîroka min û we.
Kêr gîhaştîye hestî û hindik maye hestî jî qul bike û derbas bibe.
We got, wekhevîya gelan û biratîya zimanan?
Gelan nîyha gilika we û zimanê we jî di nav zimanan de bi herikîna zemên re dibe leylan...
Û bi xatirê we, kurdên axirzeman!
Dewlemendîya mejî ji dewlemendîya mal û milk girîngtir e. Heger dewlemendîya te ya mal û milk ê tesîrê li dewlemendîya mejîyê te neke, here xwe bi wî mal û milkî re bişewitîne;
lewra tu bi xwe jî mal î!..
Hevaleke nuh derbasî nav sînorên jîyana min bû.
Ez kesekî konformîst im û dema li kesên baş û rast û durist û bikarakter rast têm, ez derî û şibakeyên dilê xwe ji wan re vedikim.
Dewlet jî yek ji wan kesan e. Li ser medyaya sosyal me hevdu nas kir û dû re rûbirû...
Li bin profîla wê nav weha bû: Cîhan Dewlet Çevîk...
Bawer bikin heta dereng jî ji ber "Dewlet Çevîk" min bi guman lê dinerî; min xwe bi xwe digot, "gelo dibe polîs molîs be" lê min zêde neajot ser.
Dû re hêdî hêdî ku me hevdu nas kir, min dît jineke kurd a xas û hur û resen e û têra xwe jî şoreşger û neteweperwer e😂
Min got:
-Keçê, ez bi çi navê bang te bikim?
Got:
-Tu bi kêfa xwe yî!..
Axir, di destpêka hevnasînê de jixwe min jê re gotibû Cîhan û nav Cîhan ma, lê...
Piştî rûbirû em rûniştin û me hevdu baş nas kir, xwe bi xwe min ji xwe re got, "Dewlet çêtir e, ji ber ku dema ez bibêjim dewlet, ew ê ew birçîbûna min a bêdewletîyê jî têr bibe û ez ê xwe xwedan dewlet hîs bikim.
Li ser telefona xwe min navê wê Cîhan nivîsandibû. Ez rabûm min li ser telefona xwe navê wê guherî, kir Dewlet û min ev peyam jê re nivîsand:
"Min Cîhan kir Dewlet û ji nuha pê ve ez ê ji te re bibêjim Dewlet, ji bo ez xwe xwedan dewlet hîs bikim."
Tu hîs bi qasî hîsa dewletbûnê xweş tune ye. Dema dewleteke meriv hebe, mîna her xwedan dewletîyan meriv jî hur û azad û serfiraz e.
Gotina Dawî
Berxwedan jîyan e, xwebierdêdan mirin e.
Û xwebierdêdan karê bêdewletîyan e, mixabin!..
